港交所作為監管上市公司嘅前線機構，平時要求股價異動公司發表通告解釋就做得多，但近期港交所股價不斷咁升，股價前日直上58元之上，成交又大增，就唔見佢哋自動自覺出聲明澄清，有啲雙重標準喎。
不過，噚日港交所終於應證監會要求發表聲明，指已知悉最近股份價格上升，但並不知悉導致價格上升嘅任何原因。
聲明又確認，目前並無任何有關收購或變賣嘅商談或協議須予公開。
不過，港交所主席李業廣本周一接受傳媒訪問時，話過將港交所股份拆細嘅機會好大，當日市場有趁呢個消息炒起港交所，但原來噚日董事會都冇討論拆細，而港交所亦冇喺通告交代，係唔係透明度低呢?
平時多多聲氣嘅港交所董事DavidWebb，今次就幫番自己人，佢話港交所已作出最快回應，並不存在監管上雙重標準咁話。