早排同班Friend講開，話好多人玩NDS隻《俄羅斯方塊DS》，對戰盛況仲癲過《孖寶賽車》！我就心諗：都06年啦，仲玩《俄羅斯》咁Out？為咗一試隻Game嘅對戰好玩度，十幾年前已天下無敵嘅我，就組成挑機五小強，踩上《G-Zone》編輯部挑機，點知俾人打到七個一皮！由嗰刻至知原來《俄羅斯》可以咁好玩！
文：陳福榮 鳴謝：《G-Zone》編輯部
我哋呢班挑機五小強，細路哥嗰陣《俄羅斯》就已玩上癮，就連搭車班師奶大叔都唔係我哋對手，諗住冇咩人可以構成威脅啦。於是就搵咗靠手提機別冊受人注目嘅機壇新貴《G-Zone》，諗住可以恰到佢哋成班新仔嘛，但一上到編輯部就Feel到強大殺氣！原來佢哋正為當日晚飯大打出手，話邊個贏咗嗰餐就「老免」，由其他人包底，咁至會逼到潛能出真功夫喎！五小強於是即時表露身份，唔單止想拆佢哋招牌，仲想呃餐飯食，所以要求一齊參與呢種為餐飯而戰嘅比賽，可惜最後五小強宣告慘敗而回！
冠軍高手教路
問番《G-Zone》兩大高手阿K同零牙，佢哋有咩致勝獨門秘訣，只見二人笑口淫淫咁推三推四，話係軍事機密唔多想教！經本人威逼利誘後，終於爆咗啲要訣；阿K話喺對戰嗰陣唔好單純咁狂砌，要有少少事前規劃，因為整個「四條」畀人，作用遠大於逐行咁掃，因此就要好好利用個Hold掣留住啲實用方塊，相比下道具反而實用性冇咁高。至於零牙就提醒大家，即使有人死咗都咪掉以輕心，事關呢班「鬼魂」可以學《炸彈人》咁搞住你，絕對要打醒十二分精神！
PROFILE
遊戲類型：PUZ
對應機種：NDS
遊玩人數：1人（可10人連線）
售價：$214
新加6大玩法
遊戲最大賣點，係串聯10部主機做無線對戰，而且仲係「一帶十打」，抵玩非常！最啱搞聚會成班人一齊瘋狂砌磚。新加模式方面，較特別係二人決生死嘅PushMode，雖然都係平時咁砌不過係直接將成堆磚壓向對手嗰邊，邊個一到底線就即刻玩完，換言之好快就分到勝負，屬高手過招專用！
贏唔到人出賤招
今次玩5vs5組隊比賽，五小強已夾定計，誓要剝《G-Zone》編輯部棚牙，有咩依郁就出絕招！一開波，連輸幾局，仲要係誇張到「5比0」，連個畫面都未睇清就輸咗！最後惟有出絕招，但凡戰敗嘅兄弟就要手口並用搞亂敵方，可惜茅招用盡，五小強照輸可也！埋單計數一鋪都未贏過呀陰功！
