孫柏文今日想用隻金手指，去篤爆一個自舊年政改以來，一路傳來傳去嘅謬論。就係公民黨會支持陳太，出戰下屆特首選舉。原先，孫柏文聽到這個消息，都覺得有道理、合邏輯。不過再諗深一層，一個喺社會福利政策上，已經被張超雄議員騎劫嘅政黨，真係會毫無保留哋支持，喺母親手中搶走個女嘅人做特首咩（呢單嘢我係支持陳太）？陳太話當年最遺憾係輿論冇支持佢，咁張超雄真係頂得順？
孫柏文諗，如果張超雄真係頂得順，全力支持陳太去選特首，咁張超雄係唔係會支持減少福利開支、積極不干預、減稅、徹底徹查社會福利署等等嘅政策？如果係咁，下次香港再舉辦世界貿易組織會議，張超雄咪會企喺警察嗰邊，揸住個大聲公，向住班韓國農民大叫：「Go,Go,WTO!」被張超雄議員騎劫嘅公民黨，真係會咁？好難相信。
鄭家富不及利世民民粹
講起公民黨，令到我又要提吓民主黨。原本都唔想講咁多政治新聞，因為自從董伯伯落台之後，政治新聞Watt數大跌，令到政治新聞嘅收視率亦都成為票房毒藥。
噚日我同世民兄傾偈，初頭都冇乜嘢，好哋哋傾吓中東政局、石油走勢、曼聯大戰阿仙奴咁。不過，一講到本地新聞，佢嘅情緒就開始愈來愈高昂。因為呢幾日嘅新聞，好多都係圍繞住兩鐵合併。
世民變超級薩亞人
世民兄係一個地球上極少數比孫柏文更右翼嘅自由市場主義者，「鐵路優先」一向以來都係令到世民兄最火滾嘅政策。世民兄話：「當巴士，小巴，的士死㗎？吓吓都話『鐵路優先』……以前都仲有個九鐵同地鐵爭吓，合併之後連九鐵都冇埋，交通政策就由『鐵路優先』變成『地鐵優先』……咁就一間公司壟斷晒交通啦……」
傾到呢度，我隻金手指就開始蠢蠢欲動，想再一次睇吓世民兄變成超級薩亞人（日本漫畫《龍珠》裏面嘅超級戰士）去鬧人。哈！哈！哈！所以我就問佢一句：「壟斷？唔使驚，啲立法會議員成日都話佢哋勁，比以前蘇聯啲計劃經濟人員醒。鄭家富一個都可以監管得掂地鐵。香港市民只係盲目追求減價之嘛？鄭家富都要求地鐵減價成半啦！」
話都未講完，世民兄即刻反駁：「香港市民盲目？我就唔相信香港人真係咁白癡，鄭家富話減價成半，咁佢點知道要減成半，你估香港人唔會叫佢攞條數出嚟睇睇呀？如果香港人真係咁白癡，下次立法會選舉，我都出嚟選，同佢鬥民粹！我利世民今日就大鄭家富5%，佢叫政府減成半，我叫夠兩成！下次有選舉，投一個叫利世民嘅人就得喇！」
LinkYeah!REIT
咁孫柏文聽見咁精采嘅說話，當然更加要煽風點火，所以我就問咗句：「超！免費呀笨？」
世民兄：「如果鄭家富話要求地鐵減價減到免費，利世民就要求地鐵現金補貼。乘客搭一程車，地鐵就送一程錢。」
孫柏文：「咁都得？……驚唔驚好似鄭家富咁被人話唔識經濟？搞臭自己個名就唔好啦。」
世民兄：「如果係鄭家富，要求地鐵減價減到免費，冇錯，佢係會俾人話唔識經濟。不過，利世民要求地鐵現金補貼，咁就會好唔同。因為我會話地鐵現金補貼，係希望谷高人流，搶交通市場佔有率，跟住地鐵站裏面嘅商舖生意好咗，就大大力加租，跟住叫美林證券幫地鐵搞番個LinkYeah!REIT。中文名叫做「領嘢房地產投資信託基金」，肯定比領匯更受歡迎。」
世民兄後來解釋，個房地產投資信託基金叫做「領嘢」，係希望地鐵招股期間可以做到人人抽到，人人有「嘢」「領」。
孫柏文