「阿好」湯盈盈在加拿大土生土長，因為家族男多女少，陽盛陰衰，故小時候上至長輩，下至兩個哥哥和表哥們都十分愛錫她。恃寵生驕的湯盈盈還經常作威作福，向母親告狀篤兄長背脊，但一離開家門，湯盈盈就打回原形做「門口狗」，遇着高大洋妞即時變乖！
湯盈盈在加拿大土生土長，出身富裕之家，因家族旺丁，兩位胞兄又分別比她年長十一歲和九歲，更令樣子精靈可愛的湯盈盈大受家人、長輩和表哥們歡迎。小時候已被捧為小公主，幸福非常。
爭做人肉枕頭
湯盈盈笑言自己的童年「個個讚我乖」，由於家人太溺愛，難免恃寵生驕，她說：「我成日蝦大哥同二哥，一來因為自己最細，二來佢兩個都好錫我，但我所謂嘅『蝦』都係好小兒科，好似想睇嘅電視節目同阿哥唔同，就會同媽咪講：『大哥蝦我！』」
湯盈盈續說：「我兩個哥哥成日爭住錫我，搭長途車嗰陣，我會瞓喺佢哋身上，佢哋仲會爭我個頭放喺邊個度、對腳又放喺邊個度。後來大哥出去做嘢，二哥就每朝叫我起身，煮早餐畀我食，又煮lunch畀我帶返學校㖭！」
搵屋企人壯膽
小霸王在家中要風得風，不過一離開家門，霸氣就會消失，湯盈盈解釋說：「我係門口狗，淨係蝦屋企人，出到去撞到啲鬼妹仔，見佢哋大隻好多，我就會變得好乖。」
憑《阿旺新傳》中李笑好一角人氣急升，湯盈盈的扮嘢本色亦教人刮目相看，原來她小時候已經很有表演慾：「我細個好鍾意扮嘢，最鍾意萬聖節喺屋企扮鬼，又會扮Madonna、MichaelJackson，十歲之後開始大膽啲，會同其他細路仔玩，但都係要有屋企人喺度先敢放膽玩，都話咗門口狗㗎啦！」
採訪：朱倬誼
部份圖片提供：湯盈盈
