華華早排講過，中移動做東，歷史性請齊五個固網同六個流動通訊商嘅巨頭食飯，華華見到城電王維基（圖右，旁為梁君彥），就梗係要八下當晚有乜火花，點知平日鬼咁惹火嘅魔鬼基，一味同華華講啲嘢食好正，鬼咁口密。
問佢之後會唔會再搞巨頭高峯會？佢就好肯定咁講：應該唔會啦！點解呀？事關其他巨頭多數都鍾意打高球，惟獨佢一個鍾意打麻雀。咁即係唔啱key啦。不過佢轉頭又話自己一個月都打唔到一次，只係過時過節陪阿媽打吓，鬆章就梗係指定嘅孝義動作。
講飯局魔鬼基就溫溫和和，一講到早前佢幫新城電台做嗰集節目，就鬼咁興奮，但又怕節目未出街先曝光，會俾人咋型，所以即時捉住電台高層，問准對方先敢開聲回應，原來只係講佢點樣畀幾個「巨人」圍毆都唔死得，等華華仲以為有乜勁料。