港股噚日第2日調整，恒指雖大跌165點，但上升股（唔計認股證）仍有240多隻，犀利！最突出嘅係成交近10億元嘅中油（香港）（135），一度搶上4.70元，收4.20元，仲大升15.8%。
中油係筆者愛股，今年1月就已經推介過兩次，一次目標價係2.30元，一次係3元，當時股價分別係1.81元同2.125元。消息來自中資線，話農曆新年過後股價就會有一番新景象，而且升幅唔會細。
中油噚日急升，係由靚靚業績觸發。05年度（12月年結），中油賺36.4億元，大升3.74倍，每股盈利76.16仙，不過，有17億元係收購附屬公司所產生嘅負商譽，即使唔計此數，每股盈利仍有40.5仙，比市場預期超出好多，股價升得有理，亦係獲利回吐最佳時刻。
逆市而升嘅股票，中新集團（563）有消息，話短期內會有大注資行動，呢間公司呢輪頻頻有動作，中資線來料話好快會見1.50元。
上月中推介過，題目係「中新非池中物」，當時股價0.92元，噚日收1.15元，升2仙，不足1個月，升幅25%，由於消息同股價表現都好勁，仲可以繼續持有。
盈利可持續上升
中新基地在北京，正發展3個大Project，今年進軍多個主要城市，包括重慶和成都；前者收購一地產公司30%股權，並擬收購餘下70%，公司擁有一優質地皮，面積9.6萬平方米，發展為商住綜合項目，土地分4個地盤，其中兩個已動工，預計07年底前可全部完成。在成都郫縣則參與城市基礎建設，投資額約12億元，公司可從售地收益中取得投資回報。
為配合北京舉行奧運，車程約2.5小時的天津市已列為第一支援區，並正進行龐大的舊城改造工程，聞說中新亦會積極參與，改造工程係一個超大型的商住及酒店綜合發展項目，預期在奧運前會完成，收益會好可觀。
中新05年度（4月年結）獲利1.8億元，06年度上半年已賺1.27億元，估計全年盈利2.5億元，PE可降至個位數。未來兩年度，發展項目陸續完工，盈利持續上升。
郭兆誠