港交所董事會呢個月底就會改選，五個人爭兩個位，都咪話唔亂。可能因為咁，有董事想趁亂為收窄股份買賣價位翻案。呢個第二階段縮窄股份買賣價位方案，喺2月中嘅港交所董事會通過，將會全面收窄0.25至20元股份嘅價位，諗住7月實施。
不過，經紀界一直反對再收窄價位，認為會減少即日鮮買賣，影響經紀收入，不過，經紀代表喺港交所董事會只屬少數，反對無效。噚日港交所又開董事會，代表經紀嘅董事李君豪話，雖然董事會已通過第二階段收窄價位，但之後收到好多投資者嘅反對意見，認為難以收回買賣成本，所以佢諗住要求下屆董事會重新討論。
李董事嘅如意算盤係咪打得響？要睇吓嚟緊嘅董事選舉有幾多經紀代表入到圍。今次選舉，李佐雄、何猷龍同朱國柱可以話代表經紀，同支持收窄價位嘅DavidWebb及陸恭蕙呢對拍檔對撼，又睇吓人多係咪可以蝦到人少。