大型測量師行久不久都會做吓啲亞洲或全球商廈租金排名榜，香港就一定上榜。一間叫做政經風險嘅顧問公司，最近公布咗一個亞洲城市商業區嘅租金排名，日本東京高踞首位，香港就以些微之差屈居亞軍，第三名原來係近年好多投資公司推介嘅印度孟買。
低沉咗逾十年嘅日本樓市，終於有番啲生氣，核心區甲級商廈租金比一年前回升3.1%，每呎月租58蚊（折為港元計），係五年嚟第一次加租，預期市道續向好，原因係好多外資基金湧入日本。
港人最關心嘅香港寫字樓，就一年勁升69%，每呎月租要56.8蚊。報告話，金融業對甲級商廈需求強勁，將好多畀唔起貴租嘅租戶，推向外圍地區，帶挈次級地區商廈。
另外，除咗商廈外，報告都有提及豪宅，東京嘅呎租係41.7蚊，香港就係34.1蚊，同樣係喺日本之後，排第二。佢哋話本港豪宅市場出現兩極化現象，新舊樓價錢差距日益拉闊。而發展商推售新盤營造出熱烈入市氣氛，但實際有唔少新樓入伙後好幾個月都係丟空冇人住。國際顧問公司有呢種睇法，都好值得注意。
電郵地址：[email protected]