行政會議通過改革賽馬博彩稅，修改博彩稅法例（BettingDutyOrdinance），容許馬會不繳交博彩稅，但與政府要分享馬會嘅博彩毛利七成或以上，而且馬會要包底八十億元，以多者為準。即係話如果馬會賺到毛利近一百二十億元，先至打和，賺到一百億，馬會要掏腰包，政府呢條橋，咪話唔辣。
何謂毛利呢？好簡單，一季投注總額假設係六百五十億元，按現時嘅派彩方式，馬會與政府共抽佣抽稅約百分之二十，剩番五百二十億元派畀馬迷。將來派彩方式不變，馬會賺到嘅毛利係一百三十億元，交稅七成嘅話，就上繳九十一億，馬會分得毛利三十九億元，用作所有營運費用兼慈善捐款。
改革博彩稅，只係馬會與政府嘅財務安排，投注方式與派彩方式冇變，但馬會多咗運用投注額嘅彈性，可與非法外圍競爭，譬如賭外圍有九折、八五折，將來馬會可以向大額投注（如一萬元以上）提供優惠，譬如回贈一成，每注一萬蚊，輸咗可問馬會攞番一千。呢個方法會唔會刺激賭風呢？左丁山與一班馬友研究過，齊齊認為唔會，因為賭馬求贏錢，唔係求回贈咁笨蛋嘅，投注開每注一百蚊嘅，點可能為咗10%回贈，改為投注每注一萬呀？稍為有啲頭腦嘅人，都知道唔會。每注一萬嘅大客，你估佢想贏三倍熱門馬吖，還是想輸咗九千？回贈只是聊以安慰，對外圍產生擠逼效果而已，買外圍要冒結算風險，俾警察拉嘅風險，如果外圍與馬會同樣有回贈，你估大戶會點樣選擇？
左丁山投注，小注十元，大注一百元，一定冇回贈，但唔會埋怨馬會不公平，你去銀行大堂排長龍，大戶去理財中心提款快夾妥，咁又點呀？去HMV買唱片買得多，都會有啲濕碎回扣啦。回贈唔係叫小戶津貼大戶，唔會刺激賭風，道德至上嘅新加坡已經係樣辦。