中央電視台《經濟半小時》節目成日揭露內地假嘢，迴響好大。前晚，個節目對黃金富檔信用卡防盜（1051），入股由許智明牽頭嘅9000億美元馬達加斯加2104油區項目提出質疑，問「這個是神話？還是謊話？」噚日，信用卡防盜股價即插近11%，收市時仲跌緊8.54%，都咪話唔厲害。
話說今年2月27號，信用卡防盜開記招，由執董劉夢熊向傳媒講解，佢哋主要透過印公仔紙入股10.5%股權呢個寶有幾咁吸引，同日信用卡防盜仲以高出首次入股1.5倍價錢，再開印紙機向許氏買多10.5%。
為咗向大家證明個項目有幾真，劉氏向大家提供咗《馬達加斯加石油地質條件評價》報告摘要，仲話係由負責勘探工作嘅遼河勘探局七個專家做嘅，兩人愈講問題愈多，好多分析員趁機鬆人，行家都覺得誇張，所謂重油「遠景儲量」159億桶，都唔知講乜。
中央電視台記者攞住個摘要，走訪中科院石油專家劉光鼎，結論係「此報告不足以做出油氣評價，因為沒有任何科學依據」，又去咗遼河石油勘探局訪問班專家，結果不問可知。由於局方唔接受央記訪問，只好回頭問番劉夢熊。
對呢個報告，劉仍堅稱遼河石油勘探局係專業機構，話有油就肯定有喎，又話三大內地石油公司只要有一間肯入股，所有懷疑都會一掃而空，但係中石油已表態唔知佢搞乜，要搵人信，睇嚟只可以搵番自己股東。
李華華
讀者如有任何意見或報料，歡迎發送電郵至[email protected]。
