兩鐵合併講咗咁多年，終於有個結果，冬冬姨多得黎文熹捨身成仁，唔使冬冬做完五年局長都冇嘢留低。官場一直有個傳言，話以黎文熹嘅性格點會敢作反，一定係有人喺背後撐佢，以消除異己、擺平反對兩鐵合併嘅阻力。咁𠵱家睇番轉頭，又好似幾可信。
邊個係幕後黑手？咁就要睇吓最後邊個係得益者。冬冬姨當然有可能；田北辰就一定唔會，兩鐵合併之後，佢同詹伯樂執定包袱都得。如果更加「無間道」啲，咁地鐵錢果豐同周松崗都有嫌疑。
嗱噚日行會一通過合併方案，地鐵即刻話「欣然宣布」達成協議，跟住周松崗總裁就直落四場──見傳媒、見分析員、見老總、見專欄作家，同錢果豐一齊由下晝踩到夜晚，出晒力推銷，慌死大家唔支持。
相反，九鐵就係咁意發一頁紙新聞稿，完全冇你咁好氣。邊個係上家邊個係下家，邊個係贏家邊個係輸家，都唔使講喇啩？
今次大製作，冬冬姨不容有失。不過，地鐵係大贏家一定唔會反對，九鐵廢咗武功可以不理，市民最緊要有價減，其他嘢唔多理，冬冬噚日猛講減價都好聰明。唯一阻力係立法會，班議員可能會阻住地球轉，總之要佢哋同意合併要花啲工夫。
譚香文烏sirsir
即如立法會議員Mandy譚香文，來自會計界，照理對收購合併之類嘅財務安排有啲認識，噚日港台《一桶金之財經新思維》跟貼新聞，搵佢訪問，節目主持趙善真同勞家樂本來諗住問佢對兩鐵合併嘅意見，但Mandy姐對方案似乎唔多理解，反而要兩個主持解釋。
Mandy姐都好坦白，一開始就話未詳細睇方案內容，仲問番轉頭兩間公司係咪合併，又口快快話要睇吓有冇賤賣資產。主持人都冇佢咁好氣，話家吓講緊出租。咁佢話自己睇資料嘅理解係兩間公司各有資產，各自經營，互不干涉，咁樣唔多好。主持人見佢唔多明，就同佢打個淺白嘅比喻，話家吓個方案一如政府做大業主，搵地鐵做二房東，幫手經營埋九鐵……到此時Mandy姐先至有啲概念。咁問佢會點樣先投贊成票，Mandy姐就話，地鐵管理水準好過九鐵，但要睇吓方案提出嗰盤數點計出嚟先，同埋財務上點樣安排收租金；咁即係支唔支持？會計界議員都係咁，其他相信更烏sirsir，睇嚟冬冬姨要拉票，都要先幫班議員開個研習班，等大家了解吓合併係乜嘢先。
傳真︰2623-9278
電郵︰[email protected]