一間由香港人主理，印度及尼泊爾人烹調的咖喱屋，經營了超過十年，近兩年老闆Andy寧願摒棄星級大廚，重新訓練一批新廚，他們優點是謙虛學習，加上他的悉心指導，一改以往的作風，令到咖喱屋內每味菜都融會了中、西、印的烹調方法，味道大有改進亦更有自己的風格。老闆還不忘加句「朋友，春天食咖喱可以去濕﹗」
記者：葉靜君
攝影：楊錦文
生力軍正在…
01Sapkotabhojraj
尼泊爾人 26歲
後生仔有衝勁有見解，難得EQ勁高，即使長期在悶焗的廚房工作也未曾發過脾氣，餐廳四款勁Sell咖喱汁都煮得很出色。
02Bhupinder
印度人 26歲
負責廚房的準備工作，切食物及清潔由她一手包辦，而不可忽略的是她醃食物也有一手，承傳了Andy中、西式的醃食物方法。
03DhanaPrasadPanday
尼泊爾人 39歲
最擅長整薄餅、燒烤及煮白咖喱汁，做出來的薄餅出奇地鬆軟，正在95%服從性，每煮一味菜之前都會給予意見。
04AliKhan
印度人 38歲
擅長煮馬沙拉汁，初入職都好硬頸，但唔係星級廚，經老闆Andy親身示範後，心服其技高一籌，於是謙虛學習。
05LaxmanSubedi
印度人 42歲
在這裏做了8年，雖非新請大廚，但勝在意見獨到，最擅長整烤餅及煮番茄咖喱汁，捧新人都要有個元老輩坐陣。
乾柴遇烈火新廚仲有火花
當星級酒店大廚放下身段入村入屋，人人追捧都嚟唔切時，「恆河咖喱屋」老闆Andy卻逆其道而行，棄用酒店大廚而改用新廚，「開舖初時都做得好哋哋，高峯期每日有成百人等位，不過自從請咗啲所謂星級廚後，佢哋好自負㗎，有晒自己一套，但水準又未必高，煮出嚟嘅咖喱唔係我想要嗰啲，啲餐湯幾乎唔飲得，當時流失咗差不多一半客人。」於是Andy由2003年開始親自監管廚房，親身在新廚面前示範及指導，而新的一批雖不是星級名廚，但亦相當資深，謙虛接受Andy的指導同時，亦會提出己見，這反而擦出火花，令餐廳的咖喱夾雜中、西、印煮法的優點，成為這裏的一大特色。
四式咖喱頂呱呱
起名咖喱屋，當然以咖喱㨘招牌。這裏有「四大咖喱」，全是經精心改良，咖喱有辣有唔辣，馬沙拉汁（Masala）取18種香料而成，少辣、香味濃而不膩；番茄咖喱（Makhani）帶酸性，茄香加香料味，夏天零舍醒胃；白咖喱汁（Korma）夾雜果仁甜香，配雞、牛脷、菠菜都啱；最後是傳統的黃咖喱汁（Curry），勝在大路配乜都得。要知道食辣能驅寒氣、排汗、排毒，春天食咖喱仲可以去濕㖭！
白咖喱蒜子烤雞$48
師傅Panday與Andy的互乘，Panday說烤雞時要先用快火煮六成熟；Andy則建議用白咖喱再煮其餘4成，令致雞外脆內香甜，質感仲好幼滑。
香料咖喱炒蠔仔鍋$60
用新鮮的蠔，煮時以少許白酒及鹽洗淨，辟去腥味，加入已爆的香料及牛油煮，還有這裏最出名的馬沙拉汁，香味猶勝蠔鮮味。
白咖喱焗膏蟹$130
其膏蟹來源與眾不同，不是普通的越南膏蟹，而是用每日空運來港的斯里蘭卡膏蟹，膏成份十分豐滿，鬆如蛋花，用已落入香料的咖喱汁炒，口感十足，蟹迷必撐。
番茄咖喱汁笋壳魚$60
採上乘笋壳魚，師傅Sapko慣用印式做汁，但Andy建議用加入鮮番茄的咖喱汁，結果汁濃味適中，酸甜醒胃，擦出中印火花。
馬沙拉汁燴羊膝$68
用新西蘭新鮮羊膝，以馬沙拉汁、香料、洋葱及辛辣香料燜4小時，再用熱水座凍2小時，難怪汁料都滲透肉內。
食客有Say
恆河咖喱屋
地點：西灣河筲箕灣道90號地下
電話：29678348
營業時間：11:00am-3:00pm、6:00pm-11:00pm
座位：約50個
