孫柏文以前做石油分析員時，喺辦公枱隔籬道牆上，貼咗大大幅世界地圖。等我可以好清楚睇到石油公司嘅石油開發項目喺邊度，又可以睇吓耐唔耐同行分析員吹嘅「國際外交危機」風，係堅定流，係唔係真係好似啲分析咁講係推高油價嘅原因。
初時，因為自己啱啱入行，又覺得作為渺小又被邊緣化嘅香港人，分析石油走勢，點會叻過嗰啲外國分析員，所以佢哋話乜乜外交危機係推高油價嘅原因，而唔係好似自己分析咁，覺得係基本供求問題推高油價，我都會唔敢出聲。不過，後來自己做石油分析員耐咗，每次聽到外國分析員話乜乜外交危機係推高油價原因嘅時候，我隻天賦嘅金手指，就會自自然然咁充滿血液，想去篤爆佢哋啲謬論。因為好多時候，只要擰轉身睇睇貼喺牆上嘅世界地圖，就知道佢哋講嘅乜乜外交危機係流嘅。我每一次聽到二流外國分析員嘅分析，就會諗：「佢哋究竟係冇錢買一幅世界地圖？定係個腦生喺個patpat度？」
到我轉咗行做財經口水佬之後，每次吹乜乜外交危機風嘅時候，聽到今時今日同行嘅分析，都想問吓佢哋同一個問題。當然，我知道作為財經時事口水佬，係一個「唯恐天下不亂」嘅行業。因為如果天下太平，口水佬就冇得噴口水，所以當同行好似偏執狂一樣，講到
近期，吹得非常之厲害嘅風，係話因為花旗國牛仔總統，會用核子武器去炸爆伊朗嘅核子反應堆，所以令到黃金、石油、白銀全線飛升。仲要好似好有根據咁，話怕有每日全球六分之一石油通過嘅霍爾木兹海峽（StraitofHormuz），會唔畀油輪過。霍爾木兹海峽唔畀油輪過係唔係好大鑊？係。花旗國用核子武器去炸伊朗，係唔係會令到油輪過唔到霍爾木兹海峽？可能係。咁花旗國係唔係會用核子武器去炸伊朗？一定唔會。我相信去到呢度，就算係金手指嘅fan屎，都會有啲唔服，會問孫柏文一句：「如果花旗國一定唔會炸伊朗，咁點解白宮西翼會傳出咁多反伊朗風聲呢？」
問得好！如果我啲同行都好似大家一樣咁好學，我隻金手指今日就唔使出動去篤爆佢哋啲謬論。因為只要有少少邏輯，都知道花旗國牛仔總統根本就冇興趣去搞伊朗。大家試試由牛仔總統嘅角度去分析，你係一個派咗幾十萬士兵去到世界另一邊嘅總統，而被你「解放」嘅國家人民，好多仲係「唔領情」咁同緊你啲士兵開拖。咁你嘅首要任務，一定係去「平息」呢啲唔領情嘅人搞出嚟嘅反抗。𠵱家，花旗國嘅士兵就紮營喺伊拉克同阿富汗，如果大家好似我以前咁，隔籬道牆貼咗幅世界地圖，唔該幫我睇睇伊拉克同阿富汗，夾住乜嘢國家。
冇錯，伊拉克同阿富汗就係夾住伊朗喇！作為金手指嘅fan屎，你果然醒目。仲有，如果大家有支marker筆，就幫我跟住軍情報告，塗咗伊拉克同阿富汗裏面，花旗國士兵仲未控制嘅地方，大家就會發現全部都係伊朗附近嘅區域。咁如果你係牛仔總統，相信伊朗喺度搞搞震，你都會用核子武器兇一兇伊朗，叫佢啲𡃁唔好喺度搞搞震。所以大家唔好覺得花旗國會炸伊朗。
相信大家會追問，咁黃金、石油、白銀都升咗，如果花旗國同伊朗唔開拖，佢哋個價會唔會跌番落嚟。孫柏文同大家講黃金、石油、白銀升根本同伊朗無關，係因為本身供求問題，所以先至升。不過，石油股今次升浪算升得少，差唔多冇跟住油價升，原因係有好多人覺得石油升係因為伊朗會被人炸，係啲短暫因素。所以，孫柏文推斷，只要今次伊朗風波平息，之後市場又見唔到油價跌，就會明白油價升係供求問題，跟住覺悟到石油股大落後，然後會入市追貨。大家最好就𠵱家買定啲883中海油，等伊朗和平。
孫柏文