尋日講完Bluebrid族譜，今日又嚟睇睇另一部Wingroad。我擁有新車無數，但至今一直未遇有泊車的煩惱，皆因我擁有的是歐、日汽車專集，當中仲有唔少只供內銷的日本同歐洲車款，一般車主真係有錢都未必買得到，而我一有時間仲會好似大多數車主一樣，會逐一翻閱自己的珍藏，又真係幾有滿足感㗎。近日，我就添置了一本東瀛本土版的日產Wingroad族譜，原來呢款車面世至今經已去到第3代，但過往這類屬家庭式的五門Wagon旅行車，在港卻一直稍欠市場支持，加上本身的外形同包裝，又未必咁討好，相信普羅的香港車迷，對其認識並不太多呢！
同級車比試好過癮
然而，近年這類車多以Sportwagon的形象示人，吸引到不少新一代車迷注目，在比較之下，你會發現呢部車不論車體內外，均有不少大改變；翻開這本Wingroad的專集，除看到部新車賣相富動感帶有跑車味道，原來個車廂編排亦見時尚具多功能意念，本身既有一台慳油的1.5公升引擎（馬力109匹）配搭，又有一台輸出較大的1.8公升（馬力128匹）型號可供選擇，還有電子四驅版本的介紹。之不過筆者至喜歡，還是專集內仲有多款同級車的比較，包括有同樣未得代理引入的本田Airwave，以及豐田CorollaFielder型號，咁深入的比試同分析好有親身經歷的感覺，作為一個鍾情汽車Fans的我，就梗係愈睇愈開心！
記者：陳偉林
