近期新股熱炒，跟住而來嘅係港口股，先有大連港，後有天津港，預料又會掀起另一個熱潮。
大連港主要業務係經營油品化工及集裝箱港口，未上市已聲勢震天，引入多名大孖沙嘅策略投資者，三分一嘅H股已名花有主，分別售予和記黃埔（013）、新加坡港務、中海發展（1138）母公司中海集團及日本郵船株式會社。
大連港發售8.4億H股，招股價2.175至2.575元，集資額唔算大，最多21.6億元，05年PE15至18倍，下周二招股，28日掛牌。
大連港上市炒風勢熾，同港口業務有關嘅股份亦會受惠。珠江船務（560）嘅「晒士」自然唔可以同大連港相比，但亦由於有得比較，PE大為偏低嘅珠船便明顯有吸引力。
珠船業務好廣泛，在香港及珠江三角洲一帶有多項投資，包括內河口岸貨櫃碼頭、客運業務同收費公路等。05年度（12月年結），營業額6.25億元，升1.9%；盈利9007萬元，升8.4%，每股盈利12仙，派息5仙，升66.6%。珠船噚日收1.30元，往績PE10.8倍，息率3.8厘。
PE低 有折讓 諗得過
大連港預期會以上限定價，上市後好大機會炒高兩三成，即係PE約23倍，珠船唔夠11倍，就有賣點，即使因為「晒士」同業務性質唔夠「專」，打個6折，PE14倍，股價都有機會上到1.68元。何況，06年度嘅盈利會繼續有增長。
珠船05年底每股資產淨值1.48元，同類股市賬率多為2至3倍，珠船家吓仲有折讓，又有諗頭，唔好話兩倍，就以1.3倍計，股價已可見1.90元。
珠船係珠三角內河運輸業嘅龍頭企業，大股東係廣東航運（即前廣東省航運廳），受惠珠三角經濟起飛，未來仲會有好大發展空間，前景看好，趁大連港上市前熱火朝天之際，短炒珠船一轉，有得諗。
大市調整，恒指跌45點，成交則縮到不足300億元，上升股有375隻，仍係個別精采之局。今次整固，幅度唔會大，後市仍要睇好，初步目標係17000，熱炒股升幅更會以倍計。
郭兆誠