雖然唔係每個舖位投資者都係春江鴨，但係市場上一有風吹草動，呢班炒家一定行得最前最急，跟風都要講個快字。世紀21楊海燕話，地鐵西港島線前期籌備工作如火如荼，正式站口位置仍未落實，但係一啲大熱門地點，如卑路乍街一帶嘅街舖，已經有炒家密密手入貨，好似由區內著名菜檔租用嘅85號舖，600呎，啱啱由區內炒家以1068萬元頂手，呎價1.78萬元，每月收緊5萬銀租，回報率都有5.6厘。
另外，同九鐵有關嘅大圍車廠項目，則帶旺咗附近大圍道一帶舖位轉售，中原許偉文話，大圍道金山樓地下5號舖，1050呎，由投資者以1628萬元購入，呎價1.55萬元，現租客係大新銀行，月租6萬8，回報有5厘。