關之琳和陳奕迅（Eason）昨日一起參觀價值近億的豪宅，二人都很喜歡，但卻異口同聲說未有能力負擔。之之又表示做藝人食得鹹魚抵得渴，Eason亦表示很喜歡影相，所以二人都不怕成為偷拍對象。
關之琳和陳奕迅昨日應邀參觀淺水灣道五十六號、價值近億元的豪宅，二人表示非常喜歡這個豪宅的環境與裝潢，之之說：「我最鍾意露台嘅按摩池，因為我好鍾意做spa，仲可以對住個海做，幾咁寫意！」
願着泳衣任影
該豪宅如此開揚，又面對沙灘，難道不怕被偷影嗎？之之坦言：「唔怕，擔心得幾多啫？食得鹹魚抵得渴，只要你時時keep住最好嘅狀態，咪唔會俾人影到啲好醜嘅樣囉，喺屋企換衫咪拉簾囉，換完咪拉番開，影到喺屋企行行企企又點啫？做幕前就係咁㗎啦，我都會去浸溫泉，會去游水，又唔係冇着，着住泳衣咪任佢哋影囉，冇所謂㗎！」
平時最反感狗仔隊的Eason，昨日亦一反常態表示不介意被偷拍，他笑說：「其實我一向都唔介意，因為我好鍾意影相嘅。有個咁大嘅露台都唔錯，可以同你最鍾意嘅人喺露台食早餐，係一件好事。」不過之之和Eason異口同聲表示未有能力買這間豪宅，之之笑言：「見到呢個樓盤真係心郁郁，真係要努力啲。」
有折都買唔起
Eason則說：「地產商就算畀好好嘅discount我都買唔起，要好努力做嘢先買得到。」記者取笑Eason現時也住豪宅，他打趣笑道：「我住緊豪宅中嘅木屋啫！」
採訪：胡比
攝影：陳俊強
