小賭王何猷龍近期喺金融圈可謂人氣爆燈，先係旗下新濠夥拍澳洲娛樂大亨PBL，搶走埋澳門最後一個賭牌，繼而宣布參選角逐港交所董事，瞬即成為大熱，連早前話有意參選嘅許浩明都縮沙，最後一刻決定唔遞參選表格，又公開撐小賭王。噚日何猷龍出席旗下新濠嘅記者會時，提許浩明唔參選，佢話好多謝對方嘅支持，又話許浩明係佢前輩。呢啲咪就係互相畀面囉！
其後小賭王又被問到有乜優勢可以打敗DavidWebb、陸恭蕙同李佐雄等重量級人馬？何猷龍好有信心咁話，自己有企業管治及市場融資嘅經驗，呢啲經驗好有用㗎。他日若然當選，希望可以協助港交所喺策略方面嘅制訂。不過，有記者私底下就話，小賭王最大優勢咪有個賭王阿爸囉！