一輪業績會後到股東大會，去開會嘅小股民一係好有責任感，一係想嚟質吓管理層，最多嘅睇怕係嚟飲飲食食攞禮物──反正冇得左右大局，攞啲着數好過。
噚日生力啤（236）開股東大會，啤酒任飲又有得食，有啤妹招待，外加八罐啤酒做紀念品，開會前一粒鐘已經有人排隊登記等入場，九成以上係年過半百嘅阿叔阿嬸。
有個持有20萬股嘅小股東（佢4蚊樓上買入，𠵱家得番個七，陰功），佢將股票存咗倉轉咗名，但冇叫銀行出張證明，結果散會都未核實到身份，終於入唔到場，嬲到一邊飲生力，一邊喺度鬧。
大會一結束，成群小股民即刻衝去排隊食嘢飲啤酒。唔少人都早有預謀，帶定車仔，一人攞兩三盒便當，兩三Pack啤酒，十足超市大減價入貨！
至於舊年6月先接任做生力啤主席嘅蔡啓文（圖三）噚日晨咁早先由菲律賓飛嚟，會後即晚搭夜機返老家，事關可以慳番一晚酒店錢喎！華華問佢做主席壓力係咪大咗，佢笑笑口話，公司係teamwork，做得好唔好，都係大家嘅事，唔係個人問題。
傾多兩傾，蔡主席忽然轉台講普通話，話佢自己係菲律賓華僑，祖籍福建，同屋企人都最鍾意飲生力清啤，以前日日飲，家吓年紀大咗，就間中飲吓啦。
