咩叫做指標屋苑呢？除咗規模要大、名氣要響、交投要旺等之外，不論市旺或者市淡，佢都係行先大市一步，對大市起指標作用，咁先配叫做指標屋苑。講完一大輪，無非想話畀大家聽，又有一個大型指標屋苑出現新低價成交啫，個市仍然係冇乜起色，起碼個勢頭短期內都無法逆轉。講緊邊個屋苑？咪係沙田第一城囉，冇錯，又係佢呀。
利嘉閣馬寶通話，一城市況繼續弱過藥煲，今個月頭十日得16宗成交，比上月同期少咗接近三成，呎價3149元，續跌3.6%，業餘炒家賺少少甚至蝕少少都要走頭，結果，繼舊年尾所謂谷底期，出現過唔少低於100萬元嘅細單位成交後，啱啱又再見番，43座極低層G室，410呎，以98萬元賣出，呎價2390元，低市價5%。
賣家2000年用103萬元買入，眼見息口不斷加，屋苑樓價又持續回落，對後市冇乜信心，蝕幾萬銀走人好過。至於買家又係投資者，有冇水位？好難講。