自從董建華以腳患為由宣布辭職，唔做特首之後，佢太太趙洪娉曝光率亦急降，但身為專門協助新來港婦女群力資源中心創會人嘅董太，噚日就特登抽空出席港台「愛心工程」活動，硬銷自己設計嘅手袋同心意卡，希望有心人買呢啲物品，幫幫新來港婦女。
自言為善最樂嘅董太話，橫掂冇乜嘢做，就幫中心設計吓啲小玩意，幫到人之餘自己又開心。有份出席活動嘅歌手楊千嬅被董太深深感動，希望可以設計埋一份。董太聽到之後就鬼咁開心，仲送咗個手袋畀千嬅。八方睇過手袋同心意卡，其實都幾靚，全部以花為主題，都應該買得過，最重要係可以幫到弱勢社群。
愛心工程主持人車淑梅見到董太，就讚佢好威猛，淑梅姐話聽到有一個新移民婦女成日俾老公蝦，個女人就同老公講話「我識董太㗎」，仲攞咗張相為證，之後佢就冇再畀個老公蝦，可見董太個名真係威震四方。唔知同佢成日語驚四座有冇關？
董太聽到之後就有啲尷尬，唔知係咪驚畀人話自己惡，竟然話冇聽過呢個傳聞，搞到淑梅姐打咗個突。
傳真︰2623-9278
電郵︰[email protected]