周迅憑《如果．愛》攞咗今屆香港電影金像獎最佳女主角，喺台上致謝辭時熱淚盈眶，去到慶功宴又鬼咁風騷，不時高舉勝利手勢，但原來呢位出爐影后，居然有漏口嘅毛病。
吳君如同田蕊妮噚日凌晨主持商台節目時，就爆咗周迅漏口呢個秘密，田蕊妮話：「我有個朋友幾年前喺內地拍電視劇，同周迅合作，佢鏡頭前講嘢好流利，但鏡頭背後，佢同人玩嘅時候原來係漏口。」
怕做訪問暴露缺點
君如亦一早知道周迅有漏口毛病，佢話：「其實佢漏口呢樣嘢我唔想講，但係既然有人同佢合作過知道，咁佢係有啲漏口㗎。最慘係佢對住識嘅人、好放鬆嘅時候，尤其係熟嗰啲同信得過嗰啲，佢漏得好緊要㖭。」君如仲話周迅驚暴露缺點，所以一直好怕做訪問喎。
其實我哋演藝界前輩胡楓都有漏口缺陷，但係奇就奇在佢哋一面對鏡頭就完全冇問題，講對白仲好流利㖭！
