「前朝」委任嘅行會成員查史美倫比較低調，不過噚日就有篇關於佢嘅專訪，係中新社做嘅訪問，內容都幾廣泛，仲爆咗少少料，話查太將會做「兩家機構」嘅董事。
個訪問係上月下旬，喺招商局大樓查太個私人辦公室度做嘅。據說當時有傳言話查太想角逐下任特首，咁佢就話「我是一位專業人士，始終對專業有興趣，還是在專業圈子裏更自在些」，即係間接否認有從政野心。今時今日，邊個會話自己想做特首咁儍呢。
講番當年應朱鎔基之邀北上做證監會副主席，搞到內地怨聲載道，查太就唔認為自己「水土不服」，只遺憾有關教育投資者嘅計劃來不及進行。佢又話，自己離開香港證監時，黃苗子送咗幅字畀佢，寫住「安危不二其志，險易不革其心」，佢北上做京官時亦掛咗喺北京辦公室內。
傳真︰2623-9278
電郵︰[email protected]