個市大漲小回，恒指跌45點，唞唞氣，等一陣再嚟過。估計下個回合，由大隻銀行股領風騷。
建行（939）昨日跌過1格，收3.425元，升番1格，已經反映晒早前所派咗嘅成績表，睇番好啲。昨日推介嘅建行C輪2293，收45仙，升2仙，值得加碼。滙控（005）跌0.50元，昨日推介嘅滙控C輪9535跌2.5仙，收34.5仙，值得低溝，滙控唔會成日低沉。
交行C輪2292：交行（3328）低見4.80元後，升番到4.85元收市，微跌1格，開始好似建行，見底回升。搵交行C輪短炒，冇隻靚得過2292。隻輪7月中夠鐘，輪價55仙，溢價1.8%，槓桿率8.8倍（有效6.6倍），引伸波幅31%。正股上番5.10元計，揸2292可賺34%。其次可以諗嘅，係4488，要畀高啲溢價。不過4488昨日冇跌，而2292則唔見3仙，所以都係優先向2292埋手。
網通C輪9515：網通（906）收14元，跌0.10元。中移動（941）不斷創新高，網通係超值電訊股，遲早有運行。
吼網通耐唔耐挫一挫，低位買C輪。冇乜得揀，得隻9515，輪價2.10元，溢價0.5%，槓桿率6.7倍（有效6.2倍），引伸波幅51.7%。留意隻輪月尾夠鐘，做嘢要輕手啲。
章盛