葉家小公主葉翠翠由於是孻女，家人對她一向千依百順。小公主被送到英國升讀中學，由於人生路不熟，又不諳英語，慘遭同學排斥，更試過被洋童鬧。但葉翠翠化悲憤為力量，用功讀書，最後科科攞A，上演真人版公主復仇記！
葉翠翠參選香港小姐前一直活躍模特兒界，去年當選港姐冠軍，即飛上枝頭；在家中，葉翠翠一樣萬千寵愛在一身。出身小康之家的她，在家中排行最小，父親是消防員，對上還有一哥一姊。正所謂「孻女孻心肝」，葉翠翠自幼就是小霸王，家人都對她千依百順。
孤獨精喊足兩年
葉翠翠說：「因為我最細，所以屋企人好錫我，我每次考試成績好，屋企人都會買禮物獎勵我，默書一百分有獎，考試高分又有禮物。我由細到大成績都唔差，所以成日有禮物，而且哥哥姐姐都好照顧我，成日孭我去游水，所以童年真係好開心。」
小學畢業後，家人便安排葉翠翠到英國讀書，這位葉家小姐，去到英國真是百般滋味在心頭，她說：「去到英國，完全係兩個世界，真係好陰功！寄宿學校一個中國人都冇，完全係冇朋友，仲要俾人排斥。初初去到唔識講英文，又冇人同我玩，要一個人食飯，有時仲俾班鬼仔鬧我，真係好慘，嗰陣成日匿喺間房喊，呢段時間都維持咗兩年。」
不敢向家人訴苦
葉翠翠續說：「嗰時打電話返屋企，講到喊都係話好掛住屋企人，唔敢話俾人蝦，因為唔想屋企人擔心。雖然喺外國唔開心，但我冇放棄，仲化悲憤為力量，勤力讀書，結果科科都攞A，所以我好多謝屋企人畀呢個機會我去外國讀書，令我識得堅強獨立，同埋永不放棄嘅精神。」難怪葉翠翠當選港姐後面對眾多負面新聞，都能淡定應付！
採訪：楊潔雯
部份圖片提供：葉翠翠
