錦陞輝劇團嘅阮兆輝（右二）、溫玉瑜同任冰兒等人，噚日出席「保良局慈善粵劇晚會」記者會，講起近來西九計劃，電影界都有代表出席研究小組，但就冇搵粵劇界，阮兆輝有啲唔滿意，佢話：「我覺得情況進展得好慢，講完又唔係。政府一向都唔放我哋在眼內，佢哋可能覺得電影先係藝術，睇康樂及文化事務署就知，康樂凌駕文化之上，絕對荒謬。何志平同霍震霆坐呢個位咁耐做過乜？」