滙控主席龐約翰下個月開完周年股東大會後就榮休，服務咗獅子行45年，呢位一向只講團隊精神，從不奉行明星制嘅領袖，臨別秋波接受英國《金融時報》訪問，罕有地流露真情一面。
回顧自己喺金融界嘅成就，連記者都諗唔到，佢老人家竟然會用「過眼浮雲」（ephemeral）來描述半生商旅生涯，「我喺呢個世上留下的唯一名號（visitingcard），就係我嘅兒女」。喺別人眼中，「龐約翰」三個字代表國際頂級銀行家，萬千景仰，但佢本人就堅持：「我只係一個靠運氣搭夠嘅普通傢伙（ordinarybloke）。」
大概就係呢種內斂、謙虛嘅DNA，造就咗一個中學會考數學唔合格、又考唔到牛津大學，連阿媽都驚佢第日搵唔到工嘅雙失青年，經過多年奮鬥後，成為全球市值第三大銀行嘅終極揸弗人。
SirJohn話，青年時嘅挫折，教曉佢點樣面對失敗，「自我（ego）係成功嘅障礙。」佢憶述喺自己過去嘅經驗裏面，遇過兩類人：一種係為權力而爭取權力嘅人，呢類人異常危險；另一類人取得權力係為咗更有效做事（powertodogood）；佢又好堅定咁話，相信滙豐每一代嘅管理層，都會比上手更出色。
龐大班呢篇訪問好值得細讀，今時今日年輕一代，一係叻唔切，一係EQ零蛋──郁下要生要死，真係應該向前輩學習。
李華華
讀者如有任何意見或報料，歡迎發送電郵至[email protected]。