尖沙嘴凱悅酒店同東英大廈，齊齊喺今年拆卸，重建銀座商場，嗰區嘅商舖前景梗係睇高一線啦，近期市道已旺咗好多，仲罕有地錄得一宗長達一年成交期嘅舖位買賣。
個舖喺凱悅對面嘅樂道九號地下，面積約1200呎，連租約，以3740萬賣出，呎價超過3.1萬，現時由酒吧以每月9.8萬承租至08年，回報率只得3.1厘，唔算吸引，但係買家就有一年成交期。至於原業主喺03年底用1580萬買番嚟，兩年幾就執到2160萬，業物升值近1.4倍。
中原九龍商舖部高級營業經理葉金豪話，呢單暫時係今年最長成交期嘅舖位買賣，正常情況成交期係3至4月，個別投資者就算畀長啲，都唔夠一年。佢話呢單係個別例子。
𠵱家尖沙嘴一個三四百呎地舖，閒閒哋要十二三萬月租；而一千呎左右舖位，叫價六千零萬。
呢個酒吧舖呎租81.7蚊，原來相比起長沙灣一個地舖租值仲要低，真係意料唔到。
聽中原工商部總經理黃應年講，長沙灣883時裝批發廣場地下12號舖，344呎，剛有客戶以每月約4萬預租，圍起一呎要116.3蚊。𠵱家個場間咗35間舖推出招租，面積100至500呎，呎租40至逾120蚊。
電郵地址：[email protected]