《至尊無賴》終於上畫，全世界焦點落在傅穎與鄭中基的接吻鏡頭，宣傳活動入面官恩娜（Ella）例牌企側邊，Ella直言：「我喺戲入面係大茄喱啡咋！」縱使係大茄喱啡，戲中飾演陀槍師姐嘅Ella一樣勤力學好一字馬、踢腿，似乎無嘢難倒佢之際，見到呢味鴨仔胎蛋，Ella即刻耍手兼擰頭：咁恐怖，咪預我呀！
記者：陳慧茵
攝影：楊錦文
餐廳依舊 男友車輪轉
銅鑼灣總統戲院對面的燕萍絕對稱得上是星級食店，阿Sa、草蜢、林一峰、鄧兆尊兄弟姊妹都係捧場客，Ella：
「第一次嚟係97、98年左右，當時都仲未入行，係朋友話好食帶我嚟試，之後就上咗癮喇！我記得嗰時仲見到何超儀㖭！咁多年自己都Keep住嚟呢度食㗎！不過男朋友都轉咗幾個咯。𠵱家心癮起，就算唔經過附近，甚至一個人都會專誠嚟食，入到嚟都唔會專揀偏僻位坐嘅，因為呢度啲職員全部都Friend晒啦，驚咩喎？」
鴨仔胎蛋$16/隻
賣相嚇人，原來係鎮店之寶，越南女人生完BB後流行食鴨胎蛋當補品，蛋內有已成形的鴨仔胚胎，由於夠滋補養顏，引得不少貪靚女士定時定候幫襯。
生牛肉湯河$25
Ella：「生牛肉湯河我每次嚟親都必嗌，河粉滑湯又好味，食足10年都唔厭！」
原來湯底用上牛骨、牛腩、洋葱、蘿蔔等熬足十幾個鐘而成，難怪味道香濃鮮甜，Ella認真識食。
牛肉粒紅飯$45
Ella：「牛肉粒新鮮又有口感，一啖紅飯一啖牛肉，簡直係絕配呀！仲有仲有，加咗番茄汁煮嘅紅飯夠晒開胃，真係愈食愈起勁！」
牛油雞翼$45/6隻
Ella胃存量有限，所以只有一大班朋友嚟先會點牛油雞翼。雞翼面層香脆，入口帶濃郁牛油香，原來是選用了比普通貨貴近5倍的法國鹹牛油，先炸後焗，難怪牛油與蒜茸香味能完全滲入雞翼內層。
燕萍越南餐廳（28329038）
地址：銅鑼灣景隆街24號地下
營業時間：11:00am-11:30pm
座位：100個
有潛質做飲食主持
為演好戲中角色，Ella勤力練習功夫，今次帶佢食功夫菜可謂合晒佢合尺！所謂功夫菜，即係考驗廚師手功的精緻菜式，但在短短幾小時的拍攝，筆者發現Ella除咗靚女、演得、唱得又擦得，其實搵佢做飲食節目主持仲適合，因為Ella把口啷過油，舉個例，對師傅拿手好菜「紅米蛋白蒸深海長腳蟹」，Ella話：
「嘩！啲長腳蟹又多肉又好味又鮮甜，仲用咗上湯煨㖭，唔似出面成日食到嗰啲咁乾身同淡茂茂，咦……啲蛋白都好滑呀！加埋紅米，好健康喎！」
嗱嗱嗱，都話Ella係美食大使㗎啦，See？
a）春笋竹影百花台$98
一上枱Ella已大叫：「賣相好靚，引到我好想食㖭！」融入法式食物裝潢，由上至下分別有蟹籽、春笋、蝦仁、黃椒絲、菠菜及紅椒絲，底層墊以蝦與洋葱熬成的醬汁及青豆角，靚到唔捨得放入口。
紅米蛋白蒸深海長腳蟹$188
師傅話：「構思菜式時以好食健康出發，用蛋白、鮮奶同上湯蒸成滑蛋白，長腳蟹亦唔係冰鮮雪藏貨。」新鮮長腳蟹體積巨型，入口比平常吃到的鮮味得多，推介！
Wasabi鮑魚白雲脆三鮮$98
脆三鮮包括海中蝦、鮑魚及墨魚片，賣相似潮州冷盤，不過醬汁卻加入Wasabi煮成，比平日的滷水醬汁清新，因為上過獎門人節目後對Wasabi怕怕的Ella都話：「食落又唔太辣喎，Wasabi仲突出到海鮮嘅鮮味。」
薑米松茸脆千層$98
去年香港美食之最大賞齋菜組至高榮譽金獎的得獎菜，薑米（前）倒入番茄湯內伴食，小棠菜（中）是清味蕾的小點，主打松茸配脆千層（後），松茸下的脆千層用上足10塊腐皮堆起同炸，難得做到香脆而不油膩。
翻雲覆雨七味魚$138
名字令人想入非非，因為豆腐白雪雪似雲，加上取「魚」的諧音而得名喎！豆腐切得極幼細，所以極考師傅嘅功架，海魚石蚌肉多而滑，Ella教路：「浸魚嘅汁酸酸甜甜，而且有燭台熱住食，魚就唔會腥啦！」
太湖海鮮城（28930822）
地址：銅鑼灣波斯富街27號
營業時間：10:30am-3:00am
座位：約230個