加息對供樓嘅累積壓力，好明顯已經影響用家入市，地產商自己都要暗啞抵用各種花招𠱁人買樓，二手市場放盤業主，就更加要接受現實，想早啲賣樓套現嘅，惟有減價最實際。
首先係紅磡黃埔花園，中原李維民話，十期5座低層B室，782呎，原叫價380萬蚊，減價幾次共31.2萬，終於以348.8萬沽出，減幅8.2%，比較94年時購入價433.8萬元，蝕85萬元，非常唔好彩。
第二單係鴨脷洲海怡半島，利嘉閣陳振裕話，1座低層B室，776呎，成交價280萬元，比原先叫價減咗10萬銀，幅度係3.4%。賣家96年用278萬元買入，計埋雜費微蝕離場，執番身彩。
最後而又最好彩嘅，係荔枝角美孚新邨百老滙街58號高層C單位個業主，中原林家傑話，業主舊年3月份用278萬元買入個單位，原本開價350萬元放售，最後要減12萬元，去到338萬元，先獲買家承接，幅度3.4%，但仍然賺咗60萬元。