近排地鐵（066）股價勢頭強勁，噚日仲創新高去到20蚊，收市報19.9，一眾小股東笑到見牙唔見眼。除咗股價多人講之外，佢哋前日個競步比賽都係圈中熱話。
其中最多人講嘅就梗係「Byinvitationonly」嘅主席邀請賽。今年參加人數多咗，但講到吸引力，比舊年差咁啲，事關去年重量級人馬，好似小小超楷楷、金管局任總、滙控艾爾敦，今年全部都已經不在陣中。
好彩兩年都有現身嘅新地郭炳聯、九倉吳天海、利豐馮國綸、城電王維基、合和胡文新、美林黃桂林、偉易達黃子欣、醫管局胡定旭，同埋周一嶽局長，齊齊親身落場，唔好睇小佢哋，事關個個都跑贏運動健將方力申！
更多人講嘅係賽果，不過唔係講今年邊個贏（今年冠軍係醫學會會董周伯展，第二同第三就兩年一樣，都係渣打蘇利民同埋信和黃志祥嘅大仔黃永光，認真巧合兼合拍），而係講番起舊年個冠軍──原來係已宣布辭職嘅九鐵黎文熹，佢競步快，點估到走得仲快！