港股跟外圍，噚日一度下跌近100點，但買盤旺盛，又掃上高收，恒指衝上16500大關，收16521，升49點，成交減縮，只得315億元。H指收6846，跌52點。唔計認股證，上升股365隻，下跌股多啲，有383隻，大市基本上係大升後嘅調整格局，16500水平會有一番爭持。
中國稀土（769）繼續發力，衝破2元大關後高收2.075元，再升0.225元，升幅12.1%，短線可以上移止賺位，繼續持有。
3月中推介世紀陽光（8276），當時股價3.35元，噚日終於升見4字頭，高收4.125元，升0.25元，貨源已盡在強者手中，都係嗰句，以上移止賺位持有，賺到盡。世紀陽光在有機肥市場佔有競爭優勢，未來3年盈利高增長，06年估達1.1億元，升55%，07年及08年分別為2億元及3億元，以08年每股盈利約0.90元，PE8倍計，兩年後股價可見7字頭。
噚日推介隻天虹紡織（2678），撞正嘉誠亞洲有盤沽，但亦有大行暗手吸納，睇嚟要食晒呢手貨先會有作為。
物流業務進入收成期
深圳國際（152）又有消息，股價亦明顯轉強，高收0.385元，升破上升旗形阻力，且有近3億股大成交支持，照度上去，上升目標指向0.44元。
2月中收到風，話深國有料到，當時股價0.305元，上升目標0.38元，早前已超額完成。噚日同一來源嘅消息話深國好快再會有大動作，今次係注資，排住隊嚟，涉及嘅項目有幾個咁多。
今年初，深國發行6億元零息可換股債券，認購超晒額，當時股價0.29元，債券5年期，換股價0.341元，可見投資者對深國幾有信心。深國要進行大注資行動，唔排除會發多次債，益人利己。上次發債後股價升逾3成，今次會升幾多？
05年（12月年結）深國獲利3.6億元，升14.7%，每股盈利3.16仙，末期息0.55仙，往績PE12.1倍。深國主要係經營公路、航空同物流，內地港口吞吐量逐步上升，為深國提供市場優勢，加上兩間物流公司已進入收成期，今年盈利應會有顯著增長，注資後，盈利能力大為增強。
郭兆誠