地產代理集團成立義工隊，招攬自願幫手嘅員工，公餘時間參與社會公益活動，好過用強迫方式要人參加咁冇癮。
世紀21今年正式成立義工隊，有超過10個成員，日前就搞咗第一個活動，同基督教勵行會（上水）服務中心聯手，帶班小朋友一行四十人去大帽山參加「親親大自然燒烤樂活動」。呢班6至13歲嘅小朋友，玩完之後仲協助清理場地。世紀21話，義工隊今年已經安排好一連串活動。佢話部份加盟商如世紀21奇峰同將軍澳，仲捐錢資助義工隊㖭。
另外，世紀21執行董事曾應豐就報料，公布集團（唔計加盟商）豪宅部50個前線首季嘅戰績，中半山客戶經理李春莉就以逾70萬元佣金（未與公司拆賬）贏得冠軍，矚目成交有中半山碧雲樓兩伙，涉資2118萬元。亞軍同季軍做到嘅佣金係50萬至60萬。
聽講豪宅部最少嗰個都有三十幾萬數。而世紀21嘅拆賬率比同行高一成，咁估計李春莉平均月入都應該接近10萬。