近期新股熱炒，投資銀行界人才搶手，噚日就有消息，話麥格里香港董事總經理溫天絡（Philip）會過檔中銀國際，出任投資銀行部董事總經理。
Philip以前做過京華山一企業融資部主管，可以話由細行慢慢爬上，𠵱家終於晉身大行。有內地傳媒更封佢為「保薦王」。
Philip喺行內好多人識，相信同佢有個孖生兄弟溫天納（Ronald）都喺投資銀行界工作有關，Ronald喺軟庫金匯融資做執行董事，被內地傳媒譽為「重組王」、「公司醫生」。
兩兄弟仲被中國人民大學聘請做榮譽講座教授，以兩人年僅36歲嚟講，真係令人刮目相看。