呢期IT界都幾悶吓，DC同手機都冇咩新技術值得煲，Mac機行Windows又只屬話題性，唔會因而帶動新機出籠，難怪電腦男同雜誌行家PC黃傾開，都話近排好難做，講嚟講去三幅被，所以傳媒大市都係圍繞住高清制式而報道。
近嚟的確多咗好多高清制式嘅相關資料，由兩大陣營拋出大堆資料互攻，到所有相關產品如燒錄機、個人電腦等排好晒期等住出，高清影碟氣氛可謂一時無兩！最近就連東芝部HDDVD機都已蒲頭，搞到好多親朋戚友都來電問電腦男，買邊部高清電視好。查實06年係開始踏入高清世代，不過唔夠實際，最起碼等到07年頭，先叫係最合適入市良機。點解？第一係本地高清廣播規格，要喺年尾先落實。第二係目前LCDTV冧價速度「緩慢」，約莫半年後，先叫真正玩割喉，到時一部32"型號隨時平過部CRT大機都未定！第三點係HD影碟過渡期嘅尾聲，市面上將陸續出現更多HD影碟，售價亦會逐步回落，珍藏愛碟係時候！
最後一點有啲私心，就係PS3推出後，電腦男預計會執番部平靚正嘅HD電視，正式投入高清世界，打其HDGame！我都知XB360都有1,080i輸出，不過電腦男始終鍾情㗎仔Game呢。
4月10日
心情：期待