噚日，講咗本欄叫《金手指》嘅原因，唔係因為孫柏文鍾意篤人背脊，係因為想紀念一齣叫《鐵金剛大戰金手指》（Goldfinger）嘅戲，同埋實現齣戲背後愛祖國嘅精神。咁篇文登咗冇耐，就收到因湊女忙碌，而暫時讓篇幅畀我嘅利世民兄嘅電話短訊。
債券市場的謎團
佢話未睇過齣戲，我就打電話叫個日日要返深圳嘅朋友，喺羅湖商業城買隻《鐵金剛大戰金手指》嘅DVD。不單止可以畀利世民兄睇，仲可以出點綿力去反美帝，撐下𠵱家喺花旗國傾緊中美貿易問題、負責外貿商務嘅副總理吳儀。
仲有，噚日收到世民兄嘅電話短訊之後，我都即刻打番電話畀佢。傾吓關於齣戲嘅事，不過因為我唔想透露太多戲情，所以係想轉話題。傾傾吓，我同世民兄唔知點解傾到關於花旗國嘅通脹問題。佢話：「當年，格林斯潘開口埋口都話債券（Bond）市場走勢係一個「謎團」（conundrum），我話債市其實好清楚咁同大家講話唔會有通脹，債市講到明話美金會保持購買力。真正嘅「謎團」，係點解黃金係咁升，令到大家都覺得，金市話美金購買力會仆直。
原本我係想同世民兄講關於「上帝大戰凡人」嘅故事，想同佢講美金債市係凡人嘅代表，而黃金就係天神嘅代表。咁佢信債市講嘅嘢，還是信金市講嘅呢？不過，因為世民兄聽我講「上帝大戰凡人」嘅故事，都至少聽過幾百次，所以我就叫世民兄唔使諗咁多，一收到我畀佢嗰隻《鐵金剛大戰金手指》DVD，即刻去睇睇。我仲用隻金手指幫佢篤咗戲裏面其中一幕，嗰幕有段對話，睇完就明白今時今日債市同埋金市，對美金購買力有乜嘢講，就係：
Bond:「Doyouexpectmetotalk？」
Goldfinger:「No,Mr.Bond.Iexpectyoutodie.」
債券先生：「你以為我會就範咩？」
金手指先生：「唔係，債券先生。我準備劏咗你。」
我相信世民兄睇完應該會有點啓發。
花旗國反黑工：全球衰退
講起花旗國問題，花旗國政府今日除咗同祖國貨品入口有問題之外，佢哋呢排對鄰國墨西哥嘅黑工入口問題都議論紛紛。有花旗國政客想一次過將𠵱家喺花旗國大約1200萬個墨西哥黑工遞解出境，仲話要侵犯祖國嘅知識產權，喺墨西哥同花旗國邊境起個B貨萬里長城，等啲墨西哥人唔可以偷渡入境。根據民調，呢個方案係得到花旗國大多數人支持。不過又有政客，因為人道理由及整體經濟大局，想大量發放工作證畀啲黑工，等佢哋可以合法化。咁孫柏文早排都用過「通識教育」嘅討論方法，分析這個問題。
總結吓嗰日篇文從經濟角度嘅分析。因為𠵱家花旗國勞動人口緊張，如果花旗國忽然冇晒黑工，咁就會有沉重嘅通脹壓力，令到聯儲局局長伯南克要瘋狂加息去壓抑通脹。咁如果瘋狂加息，就會震散全球經濟。
咁嗰日從政治理論角度分析呢件事，衍生出來嘅問題係，政客係應該有道義責任好「貼市」咁代表選民每分每秒都會轉變嘅慾望？還是應該有道義責任，就算反對民意都做自己覺得啱嘅嘢，選民唔likey可以下次唔投票選佢呢？
咁今日，我再用𠵱家好in嘅「新君王論」去分析呢件事。喺花旗國想做總統，加州同德州係兵家必爭之地。而因為兩個州都係同墨西哥為鄰，所以好多非法入境者衍生嘅問題，都煩擾呢兩個州嘅人民。近四十年，花旗國民主黨都係好倚靠少數民族去贏選舉，而共和黨就好靠白人選票。而其中一樣最多白人支持就係打擊墨西哥來嘅非法入境者，在1993年加州共和黨就係靠一條反非法入境者法例贏選舉。不過，因為居住加州嘅墨西哥裔選民愈來愈多，共和黨為了贏93年嘅選舉，就付出了喺加州銷聲匿迹嘅代價。唯一一個可以喺加州贏選舉嘅共和黨人就係阿諾舒華辛力加。佢𠵱家好慘，如果支持黑工，就會損失白人選票；不過如果反對黑工，就會損失墨西哥裔人選票，祝佢成功連任好運。
最後，除咗加州之外，共和黨都要喺全國面對呢個選票取捨方程式，所以今年11月選舉共和黨都會幾大鑊。
孫柏文