四月二十二日唔知係乜嘢好日，公民黨黨主席關信基嗰日會喺中大上最後一課，暫別教壇；另邊廂，佢有份創辦嘅公民黨亦喺同日正式展開籌募黨經費嘅活動。
八方聽聞，唔知係咪中方玩封殺，好多大孖沙都手窒窒唔敢捐錢畀由四大狀余若薇、湯家驊、吳靄儀同梁家傑牽頭嘅公民黨，到𠵱家為止，佢哋收到嘅款項好有限。
傑哥都話有聽過封殺嘅傳聞，但係公民黨唔怕，啲地產商大孖沙捐幾多或者唔捐都冇所謂，最緊要係啲香港市民支持。「一個人捐一百萬，不如搵五十個人，每人捐兩萬。」
咁又真，其實喺佢哋宣布準備組黨之後，大家都有所捐獻，唔係邊有錢開記者會同租黨總部，之後公民黨正式成立，每個創黨黨員除咗交一百蚊入黨費之外，仲交咗一百蚊年費，有啲黨員順便捐咗一啲錢，一千幾百都有，所以𠵱家佢哋唔只得五百大元咁少捐款。
八方聽聞4.22喺銅鑼灣kickoff籌款活動之後，公民黨會攞住個籌款箱落區，到時真係多多益善，少少無拘啦。
爆料熱線：29290000、27860099
報料傳真：26239278
報料電郵：[email protected]