Cookies餅女傅穎（Theresa）天生記性差、反應鈍，經常蕩失路，故其爺爺為她取名「穎」，希望她能變得聰穎點。而她的童年更因家境清貧，只能飲豬骨水代替奶粉、食即食麵當飯，以碎木當積木。
傅穎有一姊一弟，姊姊比她年長兩歲，弟弟則比她細五歲，Theresa表示童年不算快樂，家境亦十分貧困。
經常迷路
Theresa日前說：「我出世時，屋企好窮，冇錢飲奶粉，大概一歲左右，嫲嫲爺爺帶我返福州住，佢哋係買人哋賣剩嘅豬骨，煲湯水畀我飲，到返香港住之後至有能力買奶粉飲，但嗰時都冇玩具，爹哋係將啲一嚿嚿木頭髹顏色，當係積木；我細個係食即食麵大，雖然即食麵冇益，但因為平，所以一出街食飯就超開心。」
除了家貧外，小時候的Theresa也因沒記性而製造不少麻煩，她說：「以前啲人會將我個名掉轉讀，嗌我『泳褲』，但都習以為常，傅穎個名係爺爺改嘅，有啲人話個名唔係咁好，又話筆畫唔係咁好，但爺爺覺得我蠢、反應遲鈍，改『穎』字係想我聰明啲。」
Theresa續說：「其實我細個好烏龍，成日唔記得嘢，好懵，成日都蕩失路嘅，就算到咗𠵱家，我一樣試過一個月內有五日都請師傅開鎖，我嘅失憶係遺傳自我阿媽嘅。」
訛稱被虐
雖然Theresa童年有點鈍鈍哋，但仍有一般小孩的好勝之心，她笑說：「係成日自以為醒，我試過打韆鞦時飛落嚟，覺得好型，最後梗係成個人仆低傷晒。返到屋企，阿媽見我瘀晒，我就講大話作古仔，話俾人虐打，當然俾阿媽識穿咗啦，到大個咗至醒少少。」
採訪：朱倬誼 部份圖片提供：傅穎
