就嚟又到會考，唔知係咪劉細良教路，煲呔噚晚打電話上港台《星空奇遇鐵達尼》節目，同埋主持麥潤壽一齊勉勵啲會考生，當係拉抬一吓民望曲線競選。煲呔承認，有個同事叫佢聽呢啲節目，記得當年會考真係好大壓力，就算過咗咁耐都好記得，𠵱家有時發噩夢，都會夢見自己考緊會考。
煲呔話，咁大壓力都係因為佢係長子，希望能為啲細佬妹樹立好榜樣，希望啲會考生唔好放棄。佢又同啲烽煙考生對話，有個叫阿明嘅考生就問佢，點樣可以專心啲讀書？煲呔話，佢讀書唔係好叻，但專心係好重要，總之唔好分心做其他嘢，唔專心就飲杯水、食啲嘢再嚟，咁就得啦！
可惜有啲聽眾好緊張，話唔知問煲呔乜。周太最近就畀煲呔抦，喺立法會投反對票，如果啲學生下次再有機會問煲呔，記住問佢，香港啲教育成日話鼓勵獨立思考，係咪好應該趁機鼓勵啲人學周太咁，要有自己嘅主見？
爆料熱線：29290000、27860099
報料傳真：26239278
報料電郵：[email protected]