驕陽電影公司早前喺成立一周年嘅記者會度，公布今年至少投資拍六部戲，仲搵咗杜琪峯同洪金寶導演幫手，當日有線十幾個娛樂新聞台主播都有出席，身兼有線衞星電視有限公司營運總裁同驕陽總裁嘅徐小明，就介紹班主播畀導演識，公司開戲，自己友機會梗係多啲，難得有機會做明星喎，難怪班主播個個心郁。
辯稱搞氣氛
喺新知台做主播、拍過《犀照》嘅吳天瑜，直認好恨拍戲，佢噚日同馮仁昭講話：「杜琪峯套《跟蹤》開拍，我哋成班主播都有去試鏡，不過可能因為角色唔啱，我梗係想有機會拍杜導演嘅戲啦。」
至於另一主播陸浩明，當日喺台度做司儀時已不時sell自己，知道洪金寶想拍愛情片，居然話自己「斷背都得㗎」，問陸浩明係咪乘機𢱑撈，佢就話：「咁講都係搞吓氣氛，咁如果有機會拍到兩位導演嘅戲，我當然好開心，但我最想係拍江道海導演嘅戲，因為佢之前嘅《天下無賊》做動作指導，我覺得好精采。」
