迪士尼員工又投訴僱主刻薄，八方噚日問海洋公園主席盛智文點睇，佢話唔可以comment，但就畫龍點睛咁話，員工係公司重要資產，一向好重視佢哋嘅安全，仲爆響口話海威師令服裝裏面其實有兩巴風扇，仲即場問威威獅令舒唔舒服，戲服裏面位員工好識做，即刻拍晒手掌。
海洋公園個水母館噚日開幕，盛智文每次有宣傳活動都盛裝出席，皇帝、財神、殭屍都俾佢扮過晒，今次扮水母，着件衫上身之後先知原來又熱又辛苦，真正感受到員工嘅難處。
至於嚟緊嘅五一黃金周，盛智文拍心口話所有有門票嘅人都可以入場，叫人放心玩。
而俾員工多次投訴嘅迪士尼，樂園嘅培訓及發展總監黃小萍噚日喺電台節目話，考慮到天氣開始熱，會喺今個月中開始，增加演藝人員嘅休息時間一倍喎。
爆料熱線：29290000、27860099
報料傳真：26239278
報料電郵：[email protected]