個市低開高收，恒指最多跌96點，埋單反升49點，市底相當硬淨，大有欲罷不能之勢。恒指收16521，有中移動（941）做火車頭帶住上，唔使太耐，萬七點有得見。
中移動升55仙，再為恒指貢獻34點。雖然話中移動帶住個市上，但中移動始終升得太急，博中移動C輪，有一定風險，倒不如吼滙控C輪，博滙控（005）接力做火車頭。滙控落後大市，跑番快啲唔出奇。
滙控C輪9535：博滙控上去，大把C輪揀。上禮拜提過嘅2228係靚輪之一，但可能有人覺得爆炸力稍弱，其實隻輪（現價58仙，有效槓桿率都16.8倍）爆炸力都相當大。要更大爆炸力嘅，諗9535。
9535喺7月初夠鐘，輪價37仙，溢價1.5%，槓桿率35.6倍（有效21.4倍），引伸波幅11.3%。正股上2元或1.5%計，揸隻輪理論上可賺32%。
建行C輪2293：建行（939）再跌3格，由上周四高位3.675元計，總共唔見27.5仙，C輪昅得過。正路之選係熱門貨2293，8月初夠鐘，輪價43仙，溢價4.1%，槓桿率7.9倍（有效5.9倍），引伸波幅32.4%。
建行行番好啲，隻輪返番上周二高位64仙，揸隻輪變咗揸和味龍。
章盛