啱啱將件黃大仙金身賣咗，套現6000萬嘅恒豐金業（870）老闆兼主席林世榮（圖二）話，其實都唔係好捨得，但睇到金價升到咁高，個買家又咁有心，所以咪割愛囉！行政總裁伍綺媚仲話，個買家之所以咁信黃大仙，聽講係因為信咗黃大仙之後發咗達喎。
其實，除咗黃大仙金身外，仲有冇其他嘢會賣呢？林世榮話，只有嗰個世界紀錄嘅金廁所（圖一）唔賣，所有乜嘢金馬車、金觀音，同埋啲金像都可以賣。唔賣金廁所，係覺得金廁所經已變成香港景點，賣咗嘅話，感覺就好似出賣香港。
林世榮又講，早前有個嚟自中東嘅買家，話用3億買個廁所，同埋買斷金廁所嘅所有註冊，佢當然冇賣到啦！不過，佢留咗條尾巴，話第時若果個價再高啲就好難講。正所謂所有嘢都有個價，就算賣都要揀個好嘅價。唔知啲潛在買家會唔會再加價呢？