大家都知泰國出名最多鬼怪事，有一年同朋友到泰國度假，在海灘旁的餐廳吃飯，席間朋友甲講了個鬼古，謂一位香港小朋友因不聽話，獨自游向深水地方，最終一去冇回頭，所以每到半夜，沙灘旁的酒店不時有全身濕透的小孩，拍港客的房門，要求帶他回港！海風呼呼，聽得我毛骨悚然！朋友甲當然自鳴得意，還取笑我生人唔生膽！可憐的我更要和他同房，直至入睡前，他才肯收口呢！
半夜睡夢間，我被朋友甲推醒，「唔好煩我，知你大膽啦！」「唔係玩你，我聽到洗手間有腳步聲呀！」「咪講笑喇！」「你聽真啲！」我被他用力搖醒後，彷彿真的聽到「Dum……」和「撻撻撻……」，立時猛醒，「唔通個細路嚟搵你？」朋友甲：「我亂講咋，邊有咁嘅事！」怪聲愈來愈大，最後決定迫朋友甲入洗手間看個究竟，怎知他一入去就大叫，原來怪聲源自倒流的馬桶，朋友甲摸黑入房，結果赤腳踏上串串金（糞便），我火速致電服務台派人救援，查出倒流原因是廁紙瘀塞。朋友甲是個地球破壞分子，用廁紙唔使本，落得如此收場實咎由自取，最慘是我陪他清理現場至清晨四、五時呢！（五之二）
艾崙