組合Soler前晚演出無綫節目《超級靚聲演鬥廳》，獻唱劉家昌金曲《梅蘭梅蘭我愛你》，演出前Soler勁度十足，但上到台竟然少有地發台瘟，將歌詞唱到亂龍，幸最後鎮定下來才回復水準。
陳松伶、Soler、劉浩龍、尤雅及李龍基等前晚在電視城演出《超級靚聲演鬥廳》，是夜眾歌星獻唱劉家昌的經典金曲，Soler二人首次唱《梅蘭梅蘭我愛你》，未開騷前練個不停，起勁又興奮，誰知正式演出時，二人都十分緊張，開始唱時唱錯歌詞且顯得有點混亂，唱到中段才漸漸回復水準。
為自己尋根
事後Soler兩兄弟均謂太緊張，Julio說：「啲歌詞好相似，又梅蘭又梅花，我哋溝亂晒，因為一齊唱，有時一個錯第二個又跟住錯囉，我哋已經不停練咗成日㗎。」Dino則表示：「我哋見到啲前輩好開心，傾多咗偈，以前好少接觸到呢啲前輩，佢哋唱歌好聽，我哋甘拜下風。」
Soler表示日前到雲南探訪貧童，學懂凡事要珍惜，Dino說：「我哋唔可以覺得佢哋可憐，否則啲小朋友會唔開心。」二人相貌極為外國人，內地的小朋友可會不接受他們？Julio笑說：「唔會，中國有好多部族，有一個部族拜太陽㗎，soler即太陽咁解，我哋要搵番自己個族。」
大讚劉家昌
此外，陳松伶前晚獻唱《獨上西樓》，又與劉浩龍合唱《在雨中》，她表示自己是劉家昌半個徒弟，因多年前劉家昌曾聽她的唱片，於是找她到台灣錄一張懷舊金曲碟，陳松伶說：「佢教我好多嘢，對人又好好。」陳松伶透露稍後要與家人到印尼接父親，她說：「我爸爸之前喺印尼掃墓時唔舒服，我要同阿媽送架輪椅去，再接佢返嚟。」
採訪：胡比
攝影：陳順禎
