稱得上係街機武器格鬥王者嘅《劍魂》，比起同類型但淨識玩大堆頭嘅《侍魂》高幾班，唔怪得當年登陸DC就被《Fami通》贈佢滿分。今次佢一反傳統，居然由PS2版「逆」移植去街機，仲新加7大狠辣角色，畀大家喺機舖度華山論劍！
文：陳福榮
7新角狂挑舊人
造型夠搶眼係《劍魂》最大特色，唔單止各人武器夠誇張，喺打鬥系統方面亦不斷改良，例如針對揮劍時左斬抑或右斬藉以迴避，就令同廠嘅《鐵拳》都學返轉頭。《劍魂3ArcadeEdition》，只係保留番20個舊人，外加雪華、Tira同Zasalamel三名新秀，同埋可以當係「鐵拳木人」嘅Olcadan及三名家用版追加人物黃星京、李龍和Amy，總人數多達27名。據玩家報料，兩大新女雪華及Tira係今集性能超強嘅角色，唔難用兼攻擊力強，如果唔怕被人「詛咒屋企人」，大可試吓用嚟屈啲初學者。
光影效果超班
諗番11年前，使用PS互換基板嘅處女作《SoulEdge》，畫面真係嚇死人。直到《劍魂》移植到DC，畫面嘅進化作幾何級數提升，冇人相信會係嗰隻舊嘢嘅延續篇，打後大家先對《劍魂》另眼相看。到咗街機版《劍魂3》，因用咗性能較強嘅System256基板，畫面比PS2靚好多，所有特效同爆花都做得極細緻，表現仲比已經好靚嘅《鐵拳5DR》優勝！
培育一哥等人挑戰
除打9個對手嘅基本及練習模式外，仲增設全新LegendMode。玩家可以喺8場戰鬥入面同電腦隻抽，打得靚殺得快就能賺到SoulPoint幫角色升級，如果真係夠勁搞掂埋最後嗰關，你養嗰隻角色就能夠做呢部機嘅「經典角色」，畀其他玩家挑戰賺分；之後仲可以繼續養落去直至有人取代咗佢為止！
老手點睇佢？
就喺小記試Game時，忽然遇到兩位技術高超嘅玩家，原來佢哋之前都有玩開呢個系列，相請不如偶遇下，順便做埋街訪啦！
阿輝（26歲）
擅用角色：Siegfried
「我第一次玩佢咋，之前都係玩家用版多。睇網料知佢有個養人Mode，當然可以儲落卡隨時拎走就好玩好多啦，老實講畫面又真係好鬼死流暢，值8分。」
Peorth（24歲）
擅用角色：Taki
「喺Fightclub都有唔少人鑽研呢隻嘢，大家操慣PS2版，技術唔會太失禮。雖然養人同《SC2》個討伐模式差唔多咁無聊，但都值8.5分。」
測試評分
雖然《劍魂3》最大缺點係先出家用版，但掉轉睇唔少人經已操得滾瓜爛熟，一開波就有相當唔錯嘅技術，一洗上集慘被機舖老細Set晒最高難度、冇咩人捱到3Round嘅苦況。最大弱點就係LegendMode非常雞肋，玩又唔係唔玩又唔係，如果肯學《鐵拳5》咁整張卡嚟保存進度肯定過癮好多。
PROFILE
遊戲類型：格鬥
對應機種：街機
遊玩人數：1至2人
開發商：BandaiNamcoGames
價錢：每局$4（單打3Round，對戰5Round）
鳴謝：太子遊戲機中心
地址：旺角彌敦道760號聯合廣場地下