公立醫院收費勝在夠平，但私家醫院設備同環境又好好多喎！點揀好？揀公立醫院定私立醫院很視乎個人要求和實際情況，前者收費經濟，後者在醫療、環境各方面都好得多。想搵私家醫院但又未諗到邊間？睇睇以下幾間合唔合心水！
記者：黃婉冰攝影：譚盈傑
四大最Hit醫院分娩套餐
一般分娩套餐包括基本的產婦檢查、監察和護理，基本的分娩檢查、監察和護理，正常分娩及產房服務、局部麻醉，產後護理，初生嬰兒護理及沐浴指導等，至於醫生費則另計。
1.聖保祿醫院設嬰兒寄託服務
「自然分娩套餐」4日3夜住院收費：
3人房$10,880；雙人房$16,280；單人房$21,880
「剖腹生產套餐」7日6夜住院收費：
3人房$15,180；雙人房$20,880；單人房$28,880
賣點：醫院特設託嬰服務，$300/天，媽咪可生產後安心休養一段時間調理身子。另有物理治療師，親自指導產後運動。查詢：28303733
2.養和醫院特有BB暖水床
「自然分娩套餐」4日3夜住院收費：
普通房$14,800；半私家房$22,000；私家房$32,000
「剖腹生產套餐」5日4夜住院收費：
普通房$17,800；半私家房$25,200；私家房$39,800
賣點：醫院特設首天嬰兒專用暖水床，讓嬰兒可在出世後即時有個暖笠笠的環境下慢慢適應。
查詢：28358765
3.聖德肋撒醫院紀念禮物最多
「自然分娩套餐」4日3夜住院收費：
6人房$12,380；3人房$13,380；雙人房$18,380單人房$25,380
「剖腹生產套餐」5日4夜住院收費：
6人房$14,380；3人房$15,380；雙人房$23,380；單人房$29,380
賣點：最基本的嬰兒照和相片冊，每個BB還可獲贈寫有BB出生日期及時間的《聖經》、嬰兒出生記錄、各贊助商贈送的新生嬰兒禮品。
查詢：22003132
4.香港浸信會醫院套房最多選擇
「自然分娩套餐」3日2夜住院收費：
標準房$12,600；標準優等房$15,980；半私家房$19,380；私家房$26,300；豪華私家房$29,300
「剖腹生產套餐」5日4夜住院收費：
標準房$14,880；標準優等房$18,380；半私家房$23,880；私家房$31,880；豪華私家房$36,880
查詢：23398658
有痛無痛揀清楚：
自然分娩：初次順產，醫生多建議產婦進行陰切產子。會陰剪開擴闊，易於娩出。
優點：復原較快
缺點：有人比喻為十級痛楚
無痛分娩：生產過程不順利，醫生會為產婦注射麻醉劑以麻醉下半身，醫生或會借助鉗或吸盤輔助分娩。
優點：無痛
缺點：有可能出現血壓偏低情況
剖腹分娩：剖開腹部取出嬰兒。
優點：無痛
缺點：麻醉劑過後傷口痛，復原時間較長
公立醫院勝在夠平
May有一子瑪麗醫院自然分娩
「我揀政府醫院係貪佢夠平，逐日計又唔使收其他費用，相比起私立醫院真係平好多倍，我情願留番啲錢畀個仔第時用好過。況且𠵱家政府醫院已經唔同以前，啲姑娘同設備都好好多，姑娘都跟得幾貼，有問必答，生完之後一樣有講座教你點樣餵奶同休養，我覺得幾好。」
私家醫院夠寧靜
Joanne有一子浸會醫院剖腹分娩
「我老公對公立醫院無信心，加上我個醫生話浸會生產率高，所以揀咗呢間，起碼安全性高啲。雖然貴，但各樣設備同醫療都好好，最好係有姑娘幫手照顧個BB，媽咪生完可休養，環境好，我住三人房都好舒服，好靜，又無探病時間限制，各方面對個媽咪都好有幫助。」
私家醫院逐樣用品同你計到足，相反政府醫院收費平一大截，除每日住院費外，不會另加收費，入院費$50，住院費每日$100，以2日1夜計算亦只不過$250。不過公立醫院由醫生輪更，由產前檢查到分娩都會由不同醫生負責，更不能指定由某位醫生負責接生。
至於選擇私家醫院，孕婦可選擇自己的私家醫生，分娩前後可一直由他跟進。但在私家醫院內，姑娘可幫忙照顧BB，讓媽咪休息，但公立醫院則要由媽咪自己負責，果真是一分錢一分貨。
產前三周執齊「入院袋」
無論你揀公立定私家，入院前要執齊入院所需用品。為免臨時臨急有錯漏，最好在產前三周就開始執定這個所謂的「入院袋」，萬一早產或突然要入院都可以隨取隨有。另外，執袋時亦要視乎自己所選擇的是私家或是政府醫院，事關私家醫院大多都會提供基本的日用品如牙膏、牙刷、洗頭水、沖涼液等，所以話，執袋一樣好講究，有見及此，今日特登搵過來人Sivia幫你列張清單教你點執！
「入院袋」清單：
懷孕40周：胎兒身長50cm；體重3千克
胎兒變化：皺紋消失，變成一個淡紅色又肥嘟嘟的胎兒，頭骨變硬、頭髮開始濃密，胎脂在後背、屁股、關節等隨處可見，指甲已長到指尖甚至超過指尖，男仔的睾丸已完全下降到陰囊之內，而女仔的陰唇亦已充份發育，心、肝、循環、呼吸、消化等系統已全部成形。
媽咪變化：胎兒頭部會進入盆骨中，導致子宮下垂，肚子會朝前下方突出，胃和胸部的堵塞感會消失，尿頻感覺會加強，陰道分泌增多。若不時感到肚子發脹，子宮出現收縮，每日反覆多次，就是臨產的先兆。