音樂世家 棒下出神童<br>我未成年:林苑3歲登台酒干倘賣無

音樂世家 棒下出神童
我未成年:林苑3歲登台酒干倘賣無

樂壇新人林苑早前與側田一段緋聞鬧得熱烘烘,成為新聞人物。其實林苑絕對是唱得之人,才三歲已公開表演,飲歌更是《酒干倘賣無》。小時候林苑母親的家教甚嚴,反叛逃學的她,雖嘗過母親的無情棒,但仍硬頸不低頭,氣得母親哭了起來。

來自內地的樂壇新人林苑,出身自音樂世家,母親是音樂教師,父親是拉二胡及小提琴的能手。林苑才三歲已踏足舞台,後來還加入「孩子藝術團」在多個省市作巡迴演出,六歲那年更擔任春節晚會表演嘉賓。

逃學去溜冰

談到首本名曲,林苑笑言:「我由細到大都堅持唔唱兒歌,好多時都係唱《酒干倘賣無》。」
有個當教師的母親,家教自然亦較嚴厲,林苑說:「阿媽成日打我㗎,佢對住學校啲小朋友就好有耐性,對住我就冇喇,有次仲出動埋木棍㖭。」原來林苑初中入住學校宿舍後,亦變得反叛起來,一次跟同學仔逃學去溜冰,盡興而歸時,遠遠卻見到父母站在校門前,一臉嚴肅,母親還手持木棍。

見未來女婿

林苑說:「當時阿媽拎住支木棍,唔出聲咁押我返學校宿舍,一入到房佢就大喝一聲叫我跪低,然後開始打我喇。」林苑自言性格倔強,儘管母親使勁打她,她也沒流過一滴眼淚:「阿媽見打極我都唔喊,最後佢反而𤷪到喊咗出嚟。」
十七歲那年,林苑背着母親偷偷拍拖,出乎意料之外竟獲母親首肯,林苑笑說:「有次自己忘晒形,居然喺阿媽面前講咗一句『我男朋友』,之後佢都畀我每個星期六同男朋友出街,有次仲主動送我落樓,希望見吓個男仔㖭!」
採訪:李珮洳
部份圖片提供:林苑

5歲–舞台留影
「我記得呢晚係做一個公開活動嘅表演嘉賓,每次出騷前都係媽咪幫我練歌同綵排。每次演出,爹哋媽咪都會去睇,次次都幫我影相留念。其實嗰陣都有其他小朋友表演㗎,人哋個個都唱兒歌,但係我由細到大都堅持唔唱兒歌,好多時都係唱《酒干倘賣無》。」

6歲–定過大人
「嗰晚係我第一次參加重慶市春節晚會嘅表演,我係唯一一個小朋友表演,同台嘅其實都係啲內地藝人。當時好多人都以為我咁細個上到台會好驚青,不過我演出經驗夠豐富,所以表現好鎮定,仲好順利咁完成演出㖭。」

8歲–姿整女孩
「呢張都係我表演時嘅相,嗰陣雖然年紀仲細,不過我都好注重每次表演時嘅裝扮,次次都要襯靚套衫先肯出門口,有時仲會夾啲髮夾、綁吓絲帶咁點綴一下。」

22歲–進軍影壇
「我記得拍《江湖》嗰陣,同余文樂(左)有場都幾激烈嘅親熱戲,因為自己第一次拍戲,好多嘢都唔識,所以心情都好緊張,好彩戲入面嘅演員同工作人員都對我好好,教識我好多嘢。」
劇照

23歲–重返樂壇
林苑在重慶出生,畢業於重慶藝術學院,因演出話劇《這裡的夜晚靜悄悄》而獲曾志偉慧眼相中,安排她簽約其經理人公司,憑電影《江湖》打響頭炮,前年更搬來香港發展,進軍歌壇成為歌手。
資料圖片