Karen：TradingDesk，Karen。
謝太：Karen？謝太啊。我想問你點睇66地鐵，我度咗成個周末，諗緊好唔好買。
Karen：早晨，謝太。地鐵？我都有睇，上個禮拜五食完lunch之後睇住佢係咁升。啲人唱緊，政府會用靚價，將九鐵嘅好嘢注入去。因為如果唔係靚價，政府知道啲小股東唔制。不過我擔心，如果價平嘢靚，又會有人走出嚟鬧「賤賣資產」。如果好似領匯第一次上市咁、政府益小股東難產，咁𠵱家用呢個價炒注資、買地鐵，我驚會輸錢。
謝太：咁我又唔驚會注資失敗，因為領匯第一次上市，大鬧「賤賣資產」嘅人，擺到明同當時政府有仇。𠵱家見到個啲當年係「幕後黑手」嘅人，原來係Donald啲朋友，所以今次我諗唔會有人搗亂。加埋九鐵呢輪發生咁多事，我諗注資會成事。
Karen：其實，九鐵出事嘅時候，地鐵都已經升咗，我驚股價已經反映注資嘅事。
謝太：我都有諗過，不過嗰陣時大家都話九鐵賺錢唔多，甚至會拖累地鐵。點知，政府諗到條橋，由地鐵租用九鐵嘅營運權，咁樣，影響九鐵盈利最負面嘅資產折舊成本，就唔使地鐵負責。所以我覺得政府注資，就算淨係計數，地鐵股價都未完全反映。仲有，政府一向推行「鐵路優先」嘅交通政策，以前仲話有九鐵同佢爭，注資之後，地鐵就會做鐵路獨市生意，即係交通政策由「鐵路優先」變成「地鐵優先」。
Karen：謝太，我都睇好地鐵嘅鐵路生意，東涌線、機場快線、將軍澳線，嚟緊幾年都會因為人口膨脹，多好多人搭。不過睇地鐵盤數，我覺得佢哋似間有鐵路生意嘅地產公司多啲。而地鐵喺地產賺嘅錢，又唔知道會點樣，同幾時入數，好難睇清前景。
謝太：Karen，你唔好當我係基金經理先得㗎，下下都話盤數要前景清晰先至買。有時，分析股票只要捉住一兩個基本因素，就算冇數睇，都可以贏錢。冇錯，地鐵真係好依賴地產去賺錢，不過你唔好忘記，地產發展商𠵱家已經好難有地去起樓。因為政府唔可以喺勾地表減價，怕俾人話「官商勾結、利益輸送」，所以就搵地鐵做媒，幫政府放地。所以大家都見到，好多新地產項目都要同地鐵合作。變相地鐵做咗獨市地產生意。
Karen：嘩！謝太，我啱啱諗到個salespitch！喺香港人每日「衣、食、住、行」裏面，地鐵係一間政府畀佢獨市做「住、行」生意嘅公司。嘩！太勁！一定要叫人買。
謝太：我又冇咁諗過，不過你咁講又真係噃，地鐵又真係幾犀利。
Karen：謝太，我幫你落盤先，跟住我都想用個salespitch去叫其他客買地鐵。
謝太：OK，成交到，你打電話畀我啦，Bye。