紅褲仔出身嘅工銀亞洲董事兼副總黃遠輝（圖）熱愛大自然，堪稱現代農夫，見到佢，話題如果唔係金融，就梗離唔開耕種。
佢好開心咁話，呢排開始種「大瓜」，冬瓜、南瓜、節瓜、翠玉瓜乜都有，預計三個月後有收成，咁耐係因為想種得大隻啲，家吓個個禮拜日，佢都會同太太拍住拖去探下啲瓜。
夏天種瓜，冬天就種菜，最開心係種到六個直徑18吋大嘅超級椰菜，佢用保鮮紙包好，再加埋個福字利是封做裝飾，過年時就當賀年禮物，啲親友梗係開心，事關「菜」即係「財」，何況仲係「私家菜」！
除咗耕種，黃遠輝亦好玩古董，不過佢鍾意鑑賞多過擁有，費時唔覺意整爛咗，咁就心都嗡埋。而為咗方便鑑賞，佢舊年就特登學埋攝影，佢見華華身邊有攝記喺度，就即刻提出一大堆影相嘅疑難，兩個傾到難捨難離。
嚟緊呢幾日復活節長假，黃遠輝本來想去海南島或者泰國打Golf，但係機位爆晒，香港一有假期，中環人要諗活動都好頭痛，好大機會要被迫留港消費，或者近近哋去觀瀾囉！
讀者如有任何意見或報料，歡迎發送電郵至
[email protected]。
李華華